Djudyos en Espanya

Ay munchas leyendas ke mos avlan de la prezensya djudiya en Espanya i la leyenda la mas vyeja mos dize ke los Djudyos empesaron a irsen a Espanya desde el tyempo de Shelomo aMeleh. Al pareser, los Fenisyos komo puevlo semitiko i buenos navigadores, teniyan koloniyas en la peninsula Iberika ande tenemos oy los dos payizes: Espanya i Portugal. La leyenda dize ke syertos Djudyos komo famozos komersantes, se mesklaron kon los Fenisyos i se kedaron en Espanya. No egziste dinguna prova ni de arkeolojiya ni de istorya dando razon a esta leyenda. I no kreyemos ke Djudyos se ivan a aleshar tanto del Bet aMikdash en el tyempo del rey Shelomo aMeleh.

Una otra leyenda, dize ke Nabukodnozor, el rey de Bavel, yevo asta Espanya los esklavos Djudyos despues de destruir el Bet aMikdash en el siglo 6 A.E.K (Antes de la Era Komun). Lo interesante es ke estas leyendas aunke pareskan absurdas, toparon bastantes kreyentes entre los Djudyos i los Kristyanos, porke demostran ke los Djudyos de Sefarad ya estavan aya antes de la krusifiksyon de Yeshu, o mijor dicho demostrar ke los Djudyos ya estavan en Espanya antes de la yegada del kristyanizmo. De sorte ke no son los kriminales ke lo mataron, teoriya syempre empleada por los Kristyanos. En syertos kapitulos del Tanah enkontramos el nombre de Tarshish. Seya en la parte del “Shemot” (Exodus) o del “Vayikra” (Levitikus), seya en los livros de los Reyes o del Shir aShirim, este nombre aparese komo nombre de una sivdad en Espanya ke se puede identifikar kon Tartesos, serka de Guadalkivir en Andalusia.

Al pareser, los Fenisyos, para azer komersyo, viniyan munchas vezes a Tarshish ande aviya rikas minas de plata sigun los tekstos de los Asiryos, ama jeografikamente no se save muy byen ande se topava esta sivdad. De otra parte el nombre de Tarshish se konfunde kon el nombre de “Tarsus” ke esta serka de Adana en Turkiya. El mizmo nombre de Tarshish pasa en la Tora komo uno de los inyetos de Noah. Seya lo ke seya, se puede dizir ke los primeros Djudyos en Espanya estuvyeron en Tarshish, al sur de Kordova ke kon el tyempo se izo la kapital de la Djuderiya en Espanya. El nombre de Espanya en Ivrit es Sefarad.

Este nombre lo enkontramos por la primera vez en el livro del profeta Ovadya. El dize: “Los de Yerushalayim ke estuvieron en SEFARAD, van a tener las sivdades de en medyo, i los salvadores van a suvir a la montanya de Sion”. Probablemente el Profeta Ovadya o el ken eskrivyo este livro no es ke estava pensando a Espanya en el siglo sesh A.E.K. (Antes de la Era Komun). Lo ke pasa es ke no tenemos dinguna deskripsyon del lugar ande se topa Sefarad porke en el Tanah no enkontramos ni por una sigunda vez, el nombre de Sefarad. Solo, en syertos tekstos topados en Mezopotamya i eskritos en la lingua franka ke era el akadyano, igual komo el arameo, topamos el nombre de “SPARD” para dezinyar la sivdad de Sardes ke era la kapital de los Lidyos.

Sardes esta muy serka de İzmir. Aya fue akunyada (palavra en Kastilyano ke kere dizir imprintar la moneda) por primera vez lo ke yamamos “Moneda”. El mundo entero kopyaron de los Lidyos la manera de azer monedas. Savemos tambyen ke los Persos estavan i en Mezopotamya i en Anatolya en estos tyempos asta la yegada de Aleksandro el Magno ke trusho la sivilizasyon Elenistika en el siglo 4 A.E.K. (Antes de la Era Komun). El arameo komo el Ivrit se eskrive solo kon konsonantes, de sorte ke Spard se eskriviya kon “shin”, “pe”, “resh”, “dalet”. Savemos ke la letra “pe” se pronunsya tambyen komo “fe”. Por esto la palavra “Spard” se meldo “sepharad” o “Sefarad”.

En 1916, el arkeologo E. Littman topo una tavliya en barro eskrita en dos linguas: En Grego i en Arameo. El nombre de Sardes estava ekrito komo S.P.R.D en la parte Aramea. En el Talmud se avla de “Aspamia”, una tyerra a la frontyera del mundo, a un anyo de viaje de la tyerra de Israel. Klaro ke fue una forma partikular de yamar Espanya. Ama se kreye ke Sefarad se izo Espanya despues del siglo 6 de la EK. (Era Komun). El mas vyejo dokumento de la egzistensya de Djudyos en Espanya es grasyas al istoryador djudyo, Flavius Joseph ke mos avla de Herodes ke fue egzilado kon su mujer Herodia a Espanya por el emperador Caligula.

Probablamente los amantes i serkanos Djudyos de Herodes lo akompanyaron asta Espanya para kedarsen aya i esto podriya ser el empesijo de la egzistensya Djudiya en Espanya. De otra parte, San Pavlo, un rabino de nombre de Shaul, nasido en Tarsus ke despues de la muerte de Yeshu empeso a azer la propaganda de sus ideas, eskrive en sus letras ke estuvo en las Sinagogas ke egzistiyan akel tyempo en Anatolya i en los otros lugares ande el se fue. Al pareser ke se fue tambyen i a Espanya. Una koza similar mos avla el famozo eskritor Espanyol, Luis Garcia Iglesias, dizyendo ke San Pavlo tenia la kostumbre i la entisyon de endoktrinar en primero al Djudyo i despues a los de mas.

De sorte ke es normal de admitir ke devriyan egzistir komunidades Djudiyas en Espanya mizmo antes la yegada de San Pavlo. La mas antika prova ke tenemos de la prezensya Djudiya en Espanya es un pedasiko de una amfora del siglo 1 de la E.K. (Era Komun) kon syertas letras en Ivrit, enkontrada en Ibiza, una de las tres izlas de los Baleares ke apartienen a Espanya en la mar Mediterranea. En el mizmo siglo i en la mizma izla, se toparon syertas monedas de la Palestina de akel tyempo. Un pedaso de una pyedra tombal del 2. Siglo kon la palavra “Judea” se topo en Abdera. En una enskripsyon en tres linguas: Ivrit, Grego i Latin topada en Tarragona, estava eskrito: “Pas a Israel, a Mozotros i a muestros ijos, Amen”

La enskripsyon aparteniya al siglo 1 o 2 de la E.K. (Era Komun). En el anyo 305 de la E.K. (Era Komun) se reunyeron en Granada dirijentes relijyozos Kristyanos kon el nombre de “Konsilyo de Elvira” ande tomaron desizyones emportantes komo la prohibisyon de kazarsen por los Papazes; la enterdiksyon de la mujer Kristyana de kazarse kon un Djudyo, de no komer en una meza Djudiya; de no akseptar la bendisyon de un Djudyo para los kampos Kristyanos ke daran un trigo abundante... Estos kanones mos amostran ke la egzistensya de los Djudyos en Espanya era una koza ke teniya grande emportansya porke sigun syertos akademikos, las relasyones de konbivir endjuntos puediya ayudar a munchos muevos kristyanos de konvertirsen al Djudaizmo ke al pareser, la povlasyon Djudiya pujo no solo a traves de la emigrasyon ma i de frekuentes konversyones.

En konkluzyon, puedemos dizir ke la grande parte de lugares ande bivyeron los Djudyos fueron los sentros urbanos de las grandes sivdades o serka de la kosta de la mar Mediteranea igual komo afito en Asya Menor, es dizir, la Turkiya de oy. Fuente: Isabel Neto-Costa