Las Olimpiadas

Se dize ke las olimpiadas empesaron en el anyo 776 A.E.K. (Antes de la Era Komun). Aunke en las epopeas de Homero ke kreyemos ke bivyo antes de esta data, vemos ke se organizavan djugos sportivos, la data de 776 A.E.K (Antes de la Era Komun) fue akseptada por todos, porke fue en esta data ke tenemos los primeros eskritos sovre las olimpiadas. Las ramas sportivas komo la lucha, el boks, la kompetensya de korrer lo mas presto, ya se konosiyan i en Misrayim, i en Mezopotamya, ama fue en esta data de 776 A.E.K. ke vemos por primera vez, los nombres de los ganadores ke fueron eskritos en las listas de onor.

Estos nombres estan eskritos en un teksto de Hippias, un filozofo i sofisto ke bivyo en Elis, la sivdad ande se topa el stadium de Olimpiya. Los kazales ke eran estados sivdades independentes, preparavan los djugadores durante 4 anyos i los embiyavan a Olimpiya, un kazal en la Peloponeza, a una distansya de 15 km. de la mar de Iyonya, ande el estadyom dedikado al dyo Zeus era el mas grande i ande puediyan vinir munchos spektadores. Los djugos tomaron el nombre de Olimpiyadas dependyende del nombre de este kazal. Estos djugos se repetaron kada 4 anyos asta la data de 393 E.K. (Era Komun) kuando el emperador Theodosyo anunsyo ke la relijyon Kristyana va ser la relijyon del Estado Romano i komo los djugadores deviyan de kompetir desnudos, no permetyo ke se agan mas otras olimpiyadas.

Los djugadores deviyan de ser Gregos libres i nasidos de una familya normal i no de adulteryo. No deviyan de tener dinguna kulpa publika ke podriya manchar sus vidas. Deviyan de ser mas de 18 anyos i no ser esklavos. Al prensipyo, los djugos duravan un solo diya. Despues del anyo 472 A.E.K. (Antes de la Era Komun) adjustaron mas djugos i las olimpiyadas duraron 5 diyas. La noche del treser diya deviya de koensidar kon la luna yena. Al empesijo de los djugos, los djugadores deviyan de djurar ke ivan a ser onestos i ke ivan a kompatir al onor de sus kazales i de Zeus. Los famozos poetas i filozofos deviyan de meldar sus ovras.

Despues empesavan los djugos, komo el pentatlon, las korridas de arabás i de kavayos, lansar el disko, saltar leshos (antes, no korriyan para saltar leshos), luchar, korrer diferentes vezes en el stadium. Saver ke la palavra stadium vyene de la raiz “stad” i la mezura de un stad era mas o menos 185 metros. En syertas sivdades esta mezura puediya trokar entre 165 i 192 m. El diya de alkavo se metiyan las koronas de ojas de oliva (i no ojas de dafne) en la kavesa de los ganadores. Los ganadores puedyan tener tanbyen buenas pozisyones en el governo de la sivdad. Komo la rama de ojas de oliva sembolizava la paz, koronar los ganadores kon korona de ojas de oliva sembolizava la amistad i la paz entre los kazales, ke munchas vezes estavan en estado de gerra.

De otra parte la palavra stadium keriya dizir estar de pye. Solo para los altos dinyitaryos aviya asyentos de marmol. Toda la djente atendiya los djugos estando de pye al doredor del stadium. Ansi esta palavra de stadium fue formada no por los djugadores ama por los spektadores. Los ke lansavan el disko deviyan de frotar la mano kon tyerra para ke el disko no se arezvale. Esta forma de frotar la mano kon arena se empleya oy por los sportivos ke alevantan los halteres pezgados. Komo los djugadores eran deznudos, las mujeres no puediyan entrar al stadium. Si alguna vez una mujer, por kuryozidad, mirava a los djugos, puediya ser djuzgada i kastigada de muerte.

No puediyan mizmo aserkarsen del stadium. Solo las Naziras (mujer papaz, pretresse, nun) de la deesa Demeter puediyan mirar a los djugos. Tal komo los djugadores, i los djuzgadores (referee, arbitre) deviyan de djurar por la onestiya de las desizyones ke ivan a dar. Si oy tenemos algunas reglas para los djugos sportivos, por siguro fueron las reglas mensyonadas ariva ke djugaron un grande rolo. La data ofisyal de la fin de las olimpiyadas aun ke seya el siglo 4 E.K. (Era Komun), kon el emperador Theodosius, esta fin ya empeso kon la envazyon romana en las tyerras gregas desde el anyo 148 A.E.K. El interes de estos djugos sportivos disminuo kontra el interes muevo de los Romanos por los gladiatores i djugos mas salvajes.

Se dize ke mizmo la filozofiya de Sokrates izo aleshar los mansevos de syertas aktividades sportivas. Kuando empesaron en Olimpiya las ekskavasyones en el anyo 1875, el Baron Pierre de Coubertin se metyo en la kavesa de azer renaser estos djugos istorikos kon el nombre de olimpiyadas. A parte de las dos gerras mondiales, kada 4 anyos se repetyeron estas organizasyones i kada vez en un payiz diferente. Los sinko redondos ke se ven en la bandyera de las olimpiyadas, sembolizan los sinko kontinentes i el ritual de yevar la torcha desde Olimpiya asta la sivdad ande se van a azer los djugos, empeso kon la olimpiyada de 1936 en Berlin bazado sovre una envansyon del partido Nazi.