Alegria en las Fiestas

Las Fiestas mos azen orozos, mos dan la kalor de estar endjuntos kon los keridos, de saver ke apartenemos a una unidad komo la famiya, la tribu, la komunidad, a un puevlo tenyendo los mismos sentimientos, mismas kreensyas, misma istorya. Saver ke vamos a tener los mismos rituales, mismas komidas, mismas kantikas, ke mos azen dar otro pasto a la vida. El ritual mos aze akodrar syertos evenimyentos ke mos dan el gusto savrozo de la vida. Los aniversaryos de Muestra Boda, muestro Bar/Bat Mitsva, las Kandelikas de Hanuka o el Shofar del Anyo Muevo. En jeneral, la selebrasyon se aze de alma i de korason, i no kon hanefut.

Esto es para mostrar ke esta selebrasyon tiene una grande emportansya, i esta emportansya mos aze akodrar kada anyo este diya o momento tan espesyal... No olvidar ke uno de los benefisyos ke tenemos de selebrar las fiestas, es la unifikasyon de la famiya i la famiya es la alegriya de la vida de kada umano. La vida de kada diya no es syempre syerto. Es yeno de ansyas i de dudas. Saver ke tenemos de meldar la Agada, de oyir la boz del shofar, de asender la hanukiya preparar el pranso para los familyares, mos inche el korason i mos da un senso a este diya. Las tradisyones de las fiestas son yenas de rituales.

Esta bien aprovado ke los rituales azen abashar las ansyas porke las ansyas azen danyo a la vida umana. Tambyen kantar, dizir “Le Hayim” kon una kupika de vino mos da alegria. Klaro ke esto todo se puede azer durante el anyo entero; ama azerlos mientras las fiestas, en diyas espesyales tyene otra valor. Dinguna selebrasyon de fiesta puede ser kompleta sin un pranso kon komidas preparadas kon garbo. Desde el diya ke el umano kaso el animal i lo aso en el fuego, kozinar siempre fue la koza muy karakteristika del ombre. Los sientifikos syempre kijeron saver komo el ombre se izo umano, komo el meoyo se izo tal komo es oy i vyeron ke la koza primordial, fue la forma de kozinar.

El profesor Richard Wrangham, en su livro “Es kozinar ke mos izo umano” dize ke si el ombre komeriya solo krudo, no ivamos a ser lo ke semos oy. El meoyo iva ser menos desvelopado i mozotros ivamos a ser muncho mas primitivos. I esto fue, dize el prof. Wrangham, lo ke kavzo la separasyon en el lavoro entre el ombre i la mujer, deshando a la mujer el rolo de gizar, kuando el ombre esta okupado a kasar. Komparando kon los primates, vemos ke eyos kasan endjuntos. I tambyen esto fue una de las razones ke la famiya se izo Patriarkal. Aun kon esto, oy los mas famozos shefes de kozina son ombres.

Las oras ke pasamos a gizar las komidas de fiesta, a preparar el pranso, a asentarmos a la meza para komer, azen parte de las karakteristikas de un ogar, de una famiya, del ambyente de la kompanyia familyar. Partajar un pranso de fiesta simboliza la komunidad, traye la famiya entera endjuntos alrededor de la meza, i fasilita la konversasyon i la unyon de los myembros. A parte ke kada fiesta tiene su komida espesyal, kada fiesta tiene su ritual espesyal. Una koza importante en los pransos de las fiestas es ke este ritual aze reenforsar las relasyones entre los myembros de la famiya, aze ke mos sintamos ke apartenemos a esta komunidad, aze ke ayga una armoniya perfekta en la famiya.

Mizmo ke no esten de akordo, el padre i el ijo o el kosfuegro i el yerno, sovre la politika o sovre la ekonomiya del payiz, estos debates moderados sierven i ayudan muncho a la unyon de la famiya. En 2020, selebrimos todas las fiestas solikos solikos en frente de la televizyon o mirando al zoom para ser akompanyados virtualmente. Oy, grasias al Dyo, todo troko i todo se se esta realizando yene tal komo lo sonyamos. Sonyar i esperar mos da la fuersa de pasar el anyo muevo tomando todas las prekosyones kon pasensya i kon buena sensya.