Esto es Nes Gadol: Uno Mas ke se Salvo del Barko Struma

El Senyor Arnold “Noli” Engler nasyo en Chernowitz, Romaniya, en el anyo 1927. Noli era el uniko ijo de la famiya Djudiya Engler. En 1940 se fueron a Bukresh i avyeron un negosyo. Ama en 1941 empesaron a sufrir del antisemitizmo intenso i desidyeron ke el joven Noli devria de alesharse de Romaniya, i pishin perkuraron de merkar un bilyeto por el vapor STRUMA. Kon muncha difikultad alkansaron de tener el dalkavo bilyeto de este vapor. Kuando vinyeron al puerto para ver ke Noli ya esta entrando al barko, para fuirse de Konstanza, el puerto en el mar negro. Su madre ke vido el barko Struma de serka empeso a echar gritos i disho a su ijo, kon el presintimiento ke tuvo; no te desho de dinguna forma ke entres i viajes kon este barko pudrido de todas las partes.

La madre de Noli intelijente, vido ke el barko estava muy viejo i tuvo muncho sar entendiyendo ke el barko no va rezistir al viaje del mar negro. Su marido, el padre de Noli, protesto muncho este akto de su mujer, porke pensava ke este barko puediya ser la unika shans para Noli de azerlo fuir del payis. Kon muncha razon, fue eya ke gano, i el povresito de Noli tuvo ke kedarse en Romaniya, sin entender muncho de lo ke se pasava, ama kedo en vida, i se salvo de la fin maloroza del barko i de los ke estavan en el barko Struma. La fin de Struma kavzo un shok grande en la famiya i no puediyan kreer al Nes ke les afito.

A la fin del anyo 1941 en Disiembre tuvieron otra shans de poder estar en el grupo de jovenes, ke la Ajensya Djudia, (Agence Juive) estava organizando, para azer fuirlos a Palestina. Eran un grupo de 60 kriaturas, ke se eskondieron en un treno ke devia yegar a Estanbol. Kuando el treno entro a Bulgaria, la Gestapo arekojyo todas las kriaturas de mas de 13 anyos. Noli se eskondiyo detras de las validjas ke estavan ensima de los bankos. El ofisyal del Gestapo ke entro de muevo al treno para enspektar si kedava algun Djudyo, miro ke no kedo dingunos, empeso a salir del kompartimiento. En supito, kayo de la kavesa de Noli el Tefilin ke se rezvalo de la sudor i de la emosyon immensa ke tuvo el ijiko.

El ofisyal Aleman miro por ariva, vido los ojos de Noli, lo miro, lo miro i lo miro… Sin dizir nada torno la espalda i salyo del treno. Otro ‘Nes Gadol’ ke izo salvar Noli Engler de muevo... Asta oy, Arnold (Noli) ke esta bivyendo en los Estados Unidos, no topo dinguna eksplikasyon a este akto inimajinable del Gestapo. El solo sovrebivyo entre las 60 kriaturas ke dezaparesyeron en Auschwitz. Kuando el treno entro a Sirkeci i ke Noli vido los minaretes de Sultanahmet o de Ayasofya, el ya no pudo rezistir a la emosyon de la salvasyon i empesa a yorar oras i oras. En Estambol, la komunidad Djudia, se enkargo de protejar Noli unos kuantos mezes antes de mandarlo a Palestina por el kamino de Sirya i Lebanon.

Mientras ke estava en Estambol, Noli se iva kada diya al Kal Ashkenazi de Yüksekkaldırım. Kuando yego a Palestina, sus tiyos i tiyas ke avian emigrado en los anyos1920 i 1930, se enkargaron de engrandeser Noli. El partisipo a la gerra de independensya en 1948 kon la Hagana i en 1949 entro al Tsahal. Estudyo en la Universidad de Yerushalayim i termino su doktorado de Fizika Nuklearya en la Universidad de Suisa. Despues de los estudios en Suisa paso a los Estados Unidos i se izo profesor en la Universidad de Carnegie Mellow (Pittsburgh, Pennsylvania). En 1995, Arnold (Noli) vino a Estambol para asistir a la boda de su ijo Jonathan, kon Beki Behar de Caddesbostan, en el kal Ashkenazi i se akodro de muevo, de toda esta aventura ke le paso por su kavesa i ke formo su vida yena de nes.

Esta istoria de su padre, me la konto Jonathan, ke vino kon Beki i sus ijos, para vizitar el padre i la madre de Beki, ke oy en diya biven en Caddebostan. Esto es lo ke puedemos yamar Nes Gadol.