Los Djudyos en la Konkista de Estambol

Una de las primeras kozas ke el Sultan Mehmet izo en Estambol fue de kudiar la povlasyon de Estambol i de mijorar la situasyon de mizerya ke Estambol estava sufriendo en 1453. La sivdad de Konstantinopla kuando paso al Imperyo Otomano, no tenia una povlasyon mas ke 30 mil almas. A parte ke las murayas estavan derrokadas, los sivdadanos al no tener dinguna esperansa de salvasyon, la sivdad kayo en una profunda provedad. Por esta razon el Sultan ordeno de povlar Konstantinopla i de mijorar la situasyon lamentable de la sivdad, i restorar lo mas presto posivle todo lo ke estava derrokado. En 1480 se dize ke la povlasyon suvyo a kaji 200 mil personas.

Kuando Ibni Batuta paso por Konstantinopla en 1330, diziya ke en la sivdad egzistiya 13 maales a parte de Galata i en 1480 kontaron ke aviya 180 maales. Es ke izyeron trayer djente de otros kazales, sea del interior de Anatolia, sea de los Balkanes. Los kriteryos de seleksyonar la djente para Estambol era tener buenas kalidades, onestiya i kultura. Los Djudyos respondiyan a estos kriteryos. Los primeros djudyos vinyeron de Anderne, Bursa i Selaniko. Klaro ke la povlasyon Djudiya pujo muncho mas kuando uvo la ekspulsyon de Espanya en 1492. Es ke no tenemos munchas fuentes para konoser en detaylyo esta emigrasyon. Las unikas fuentes a parte de los livros otomanos, eran los istoryadores Dukas, Kritovulos, Eliyahu Kapsali, un poko de las fundasiones de Mehmet II i los eskritos del Profesor Halil İnalcık.

Por los Djudyos de antes de la konkista, Binyamin de Tudela dize ke todos los Djudyos moravan enfrente de Konstantinopla ande oy yamamos Galata o Pera. Kuando el vino en 1176, vido ke los Djudyos no tenian derecho de kavalgar (suvir a kavayo) i devian de pasar la mar (Kuerno de Oro) en barka para avlar kon los dirijentes. Binyamin mos konta ke aviya 3 klasas de Djudyos: Los Rabanim, los Karaim i los Romanyotes. Eyos biviyan en la mizma maale ma tenian paredes ke los separava. Otro viajero ke vino a Konstantinopla antes de la konkista, fue Ibni Batuta en 1330. El mos dize ke la persona ke le ambezo komo avlar kon el emperador era un djudyo ke konosiya el Arabe.

Un pelegrino, Ruso Zosima, mos ambeza ke aviya una puerta en las murayas serka de Gülhane Park de oy, i ke se yamava “Porta Judea”. El nombre de esta mizma puerta se ve en la mapa de Buondelmonte en el anyo 1422. Otro viajero, “Bertandon de la Broqueria”, en 1430 mos avla de los djudyos ke bivian en Galata o Pera (ayi en frente), maale ke kedo syempre komo sentro komersyal. La politika del Sultan Mehmet II era de trayer a Estambol Djudyos de otros kazales. Segun Bernard Lewis, fue una forma de ekilibrar el komersyo kon los komersantes Bizantinos. Ademas los Djudyos eran konosidos komo el Puevlo del Livro, kapachis i djente de fiyar ekonomikamente i politikamente.

Eliyahu Kapsali ke era el sovrino de Moshe Kapsali, el Gran Rabino en la epoka de la konkista, mos dize ke el Sultan Mehmet aviya permetido a los Djudyos de enstalarsen en kualker kazal del Imperio. Kapsali dize ke mizmo el Sultan se ambezo el Ebreo de un maestro Djudyo. El istoryador Kritovulos ke fue testigo de la konkista, mos dize komo los Djudyos fueron establesidos en Estambol. En el livro de Povlasyon del anyo 1455 esta eskrito ke Djudyos de Yanbol, Ohri, Ishtipol, Trikala, Filibe i de Sofya, kazales de Bulgaria de oy, vinyeron todos a Estambol. Otro livro de Poblasyon, del anyo 1485 avla de “El Djudyo Salamon, nasido en Nigbolu i ke bive en Estambol”, “El Djudyo Yako, nasido en Kasturiya, (Gresya de Oy) i ke bive en Estambol”.

En un edikto del Sultan Mehmet esta eskrito ansi: “En Konstantiniye, la maale de los Djudyos de Edirne”. De todo esto entendemos ke Djudyos de Anderne vinyeron a Estambol. Savemos ke siertos Djudyos ke fueron forsados a egzilarsen de Bursa a Estambol, fuyeron atras a Bursa i estos fueron enkarselados. A parte de Bursa, de Anderne i de Salonika, Djudyos de diversas partes del Imperyo Otomano vinyeron a Estambol en la mizma epoka. Los Djudyos de Salonika moraron en Balat. Kreyo ke munchos se van a akodrar del kal “Selaniko”, i esto es una prova ke en Balat moraron estos Djudyos. Solamente es ke no estamos muy seguros si este kal fue del siglo 15 o 16.

Avram Galante i Stefanos Yerasimos mos dizen ke Djudyos de Antalya, Tire, Sinop, Ayasuluk (oy Selçuk), Eğridir i Kastamonu vinyeron a enstalarsen a Estambol. Segun las estimasyones, la povlasyon Djudiya en Estambol, en el tyempo de la Konkista devriya de ser komo 10,000 a 13,000 personas. Ama kon la yegada de los Sefaradis, esta povlasyon pujo a munchas mas almas. Una diskusyon ke duro anyos, fue ke si la yegada de los Djudyos a Estambol fue forsada por orden del Sultan, o voluntaria? El kavzo del Djudyo ke fuyo a Bursa i ke fue enkarselado mos da pensar ke puedia ser forsado. Segun el istoryador Bernard Lewis, los ke vinyeron en la konkista devian de ser forsados; i los ke vinyeron de Espanya, Portugal, Italya i los Ashkenazim eran voluntaryos.

Djudyos de todo el mundo, agora tienen sus Patriya Bendicha, kon las puertas ampliamente aviertas a todos los ke keren vinir a la tierra prometida, kon sus propria voluntad. Adaptado i kompilado de un estudio universitario.