La Sinagoga

Savemos ke la Sinagoga fue el sentro relijyozo i sosyal de la komunidad Djudiya, tenyendo el puevlo Djudyo en una komunidad unida despues de la destruksyon del Bet aMikdash. Ama oy en diya no savemos muy byen kuando empeso la egzistensya de la Sinagoga. La palavra Sinagoga es una palavra grega ke kere dizir “Lugar de reunyon”. En grego ay otra palavra ke dize la mizma koza: “Eklezya”, “Lugar de reunyon”. En ivrit dizimos “BeytKeneset” “Kaza de reunyon” o “BeytTefila” “Kaza de orasyon”. En Ladino dizimos “Kehila” ke tambyen kere dizir un lugar ande el “Kahal” o grupo de djente se reunen. En Turko dizimos “Djami” ke kere dizir lugar de reunyon.

La rais de esta palavra es “Djem” ke kere dizir la “suma” de kozas o de personas. De sorte ke la Sinagoga sirvyo komo kaza de orasyon, komo un sentro komunal, komo una kaza ande se enkontra la komunidad, komo un lugar para selebrar todos endjuntos fyestas o konsolar los serkanos de un funeray, komo un lugar de karidad i de piedad. De sorte ke la Sinagoga fue una inovasyon muy radikal en la vida del Djudyo, porke empeso a adjuntarse kon mas djente por las orasyones o aktividades sosyales, lo ke no puediyan azer en el Bet aMikdash ande solo los ofisyantes komo los Kohanim i los Leviim entravan.

Una gran mayoriya de akademikos pensan ke la Sinagoga empeso kon el egzilyo de Babilonya, para pueder ensenyar la Tora a los chikos, para mantener las tradisyones i kuidar a ke no se pyedran. El akademiko Aharon Openheimer no esta de akordo kon esta teoriya, dizyendo ke el Talmud Bavli ke trata de la epoka del egzilyo se eskrivyo 1000 anyos despues de este evenemento i ke no ay dinguna evidensya de arkeolojiya relativa a esta epoka. Una segunda teoriya dize ke la Sinagoga empeso kon Ezra i Nehemiya despues ke tornaron de Babilonya, en el siglo 5 A.E.K. (Antes de la Era Komun). Sigun Ismar Elbogen, el tyempo de Ezra era el tyempo ke sirvyo a desvelopar la liturjia de la Sinagoga tal komo la seremoniya de meldar la Tora.

Una tresera teoriya dize ke la Sinagoga empeso en el tyempo Elenistiko (Siglo 4 A.E.K.) (Antes de la Era Komun) en Misrayim. Sigun Rahel Haklili, fue aya ande se enkontro por primera vez la enskripsyon de “Sinagoga”. Una kuatrena teoriya dize ke la Sinagoga empeso kon los Farizim en la epoka de los Hashmonaim. La sinkena teoriya dize ke la Sinagoga se desvelopo despues de la kayida de Yerushalayim en el anyo 70 de la E.K. (Era Komun). Lo ke pasa es ke la Sinagoga devriya egzistir bastante antes de la kayida de Yerushalayim, sigun los eskritos del filozofo Filo, sigun el istoryador Jozefus i sigun el livro de los Macabim, Sinagogas egzistiyan seya en Palestina i seya en la diaspora komo la Sinagoga de la Sivdad de David ke egzistiya mizmo 150 anyos antes de la kayida del Templo por los Romanos en el anyo 70 de la E.K. (Era Komun).

Sigun los eskritos savemos ke esta Sinagoga serviya para la orasyon, para ensenyar la Tora i mizmo para djente ke veniyan de leshos i ke no teniyan lugar para kedarsen. De todas estas teoriyas, la teoriya de la epoka elenistika de la Diaspora mos konvense mas ke las otras tenyendo provas de restos arkeolojikos. Puedemos dizir ke la komunidad Djudiya en el Galut, izo ke la Sinagoga seya el lugar ande se konservaron las tradisyones de la identidad Djudiya, tenyendo en kuenta la politika, la liturjiya, la vida sosyal, la edukasyon, la djustisya i la vida espiritual. Fuente: S. B. Jang de la Universita Bar Ilan