La Madre

Desde syempre las mitolojiyas de todas las kulturas asosyaron la mujer kon la tyerra, kon la luna, o a vezes kon la kulevra. La relasyon de la mujer kon la tyerra vyene de la asemejansya de la semiya ke entra a la tyerra i la semiya ke entra a la matris de la mujer. De las dos formas, la semiya forma una planta o una kriansa. Por esto tenemos en las mitolojiyas la figura de la Diosa Madre ke se simboliza komo estatuas chikitas de mujer bastante godra. En kaji todos los muzeos en Turkiya, mos amostran estas estatuas ke datan de la epoka neolitika i mizmo antes. La epoka neolitika es la epoka kuando el umano empeso a fraguar kazas, sembrar, arar la tyerra, enstalarse en un lugar sin ser ovligado a ser nomado para kasar i bivir en kuevas naturales.

Komo la tyerra da el trigo, la mujer da su leche para azer bivir su kriansa. Por esto en las linguas ke empleyan el jenero (feminino o maskulino) la tyerra es feminino i en Turko la tyerra se konose komo la “Madre Tyerra” (Toprak Ana). Yene en la epoka neolitika, kuando enterravan, metiyan el puerpo a la tyerra en forma del bebe komo estava en el fetus de su madre, es dizir en forma “Hoker” ke konsiste a tener las pyernas serka de la tripa. Enterrar en esta pozisyon da a entender ke aviya la esperansa de naser en la otra vida tal komo se nase en esta vida grasyas a la “Madre Tyerra”.

Yene es por esto ke la mujer es bendicha tal komo la tyerra es bendicha. La mujer sterila ke no puede tener krios se konsidera komo un kampo ande no krese ni yerva. Otra asemejansa de la mujer es kon la Luna. En munchas kulturas, la luna fue yamada la Reyna o la Diosa Madre del syelo. La relasyon la mas tipika entre la luna i la mujer es el siklo de la luna alderredor del mundo ke dura un mez, kon la menstruasyon de la mujer ke okurre una vez al mez. En la antikuedad, la Diosa Madre se simbolizava kon los kuernos de la vaka. Los kuernos de la vaka son komo la medya luna del RoshHodesh.

En munchas poeziyas, pintan la mujer komo si fuera la kara de la luna (Ay Yüzlü) porke la luna es el simbolo de la ermozura. La asemejansa de la mujer kon la kulevra vyene de la lejenda de Eva ke fue sedusida por la kulevra, ke teniya la forma de una mujer yamada Nahash. Ama de otra parte esta asemejansa en diferentes kulturas se interpreta kon una mala fama, dizyendo ke la mujer es una kulevra. Kon todas estas asemejansas, la mujer fue syempre la sombra ke esta en la tyerra de la Diosa Madre ke esta en el syelo, A esta diosa los Sumeryos la yamaron Inana, en Babel, se yamo Ishtar, en muestras tyerras se yamo Kibele, en Efesos Artemis, en Gresya Demeter (Deus Mater-Diosa Madre).

Estos kultos de Diosa Madre izo ke segun algunos istoryadores, la komunidad era matriarkal, es dizir dirijida por la madre, ke kon el tyempo troko a ser patriarkal, es dizir dirijida por el padre. Ama seya lo ke seya, la madre fue syempre la patrona del ogar, de la kaza, de mantener el orden en la famiya, de ser la Santa Bendicha mujer de la umanidad i nunka perdyo su valor para ser adorada.