Siertas Kuryozidades de Ayer

La mujer de oy es mazaloza porke puede saver en el momento si esta prenyada o no. Ama antes? Ke aziyan para estar seguras? Las mujeres de Ejipto de aze 3500 anyos, komo las de oy, pishin kerian saver el djenero del bebe ke iva naser. De los papirus entendemos lo ke aziyan. Eyas tomavan 2 platos ande metiyan, en el uno sevada i en el otro trigo, i vazyavan sus urinas a estos platos. Si la sevada dava ojas, keriya dizir ke va tener un ijo. Si el plato de trigo dava ojas, esto keriya dizir ke el bebe ke iva naser, iva ser una ija. Ay komo mas de 12 ojas de papirus ke mos konta estos egzamenes de las mujeres kuriozas de saver el djenero del bebe ke va naser.

Los fragmentos de papirus mos dizen i las otras formas para saver si el bebe va ser ijo o ija. Si la futura madre dezea muncha dulsuria, es ke va naser ija. Ama si kome muncho ajo i tiene una mirada sana, va ser ijo, i si los ojos de la prenyada se le engrandesen, tambien sera ijo. Ama si le sale manchas, es ke va naser ija. El instituto de la salud nasyonal de Ejipto, asiguro en el anyo 1963 ke 70% de las provas kon sevada i trigo salyeron pozitivas. I esto mos aze pensar a las eksperiensas de antes 3500 anyos, ke eran kaji korektas. La tinta de los Ejipsyanos antiguos mos dize ke eyos teniyan una teknolojiya muy avansada.

Esta tinta konteniya kovre i no era bazada sovre karbon, komo se kreyeron todos los ke estudyaron los papirus asta oy. Los envestigadores syempre kreyeron ke toda tinta era echa solo kon karbon. Lo ke los soferim (los eskrivanos) ejipsyanos utilizaron fue un deskuvrimyento de la parte de la Universidad de Kopenhag. Saver ke el ‘’Papirus’’ mos dyo lo ke yamamos oy el ‘’Papel’’. Para azer las ojas de la ‘’Planta del Papirus’’ se tomava la ‘’Sevada’’ (el ilik) de la planta ke tambien serviya para azer barkas, kuedras, esteras, sandalyas i sestos. La rais del papirus sirvyo para azer melizinas i perfumes. La universidad de Kopenhag dize ke es grasyas al kovre ke la tinta de los fragmentos de papirus no dezaparesyo.

Diyonisos era el dyo del vino. Dionisos en grego kere dizir nasido 2 vezes. Es ke segun la mitolojia Grega, Zeus se enamoro de Semele. La mujer de Zeus, Hera, era muy seloza. Eya se fue a Semele i le disho de dizir a su amante, Zeus, de no trokarse kuando ivan a versen i ke se mostre a eya tal komo es. Zeus era en su mundo natural un relampago (şimşek) i efektivamente Semele ovligo a Zeus de no trokarse kuando vino a azer el amor kon eya. Zeus izo lo ke le demando Semele, ke dezaparesyo al momento kuando Zeus se aserko de eya. Drama de situasyon, porke Semele estava prenyada.

Zeus pishin tomo el bebe antes ke se muera i lo metio a su pyerna ande fue enkubado algunos mezes. Kuando vino la ora de naser, nasyo de la pierna de Zeus. Es asi ke tomo el nombre de ‘’Dionisos’’, “Nasido dos vezes”. Dionisos se izo el simbolo de la reenkarnasyon i la reenkarnasyon es el simbolo del renasimyento. Es dizir, de la primavera. Esto se selebra kon bayles i bevyendo vino, kaji komo ‘’Ad lo yada’’. Es de esta tradisyon pagana ke tenemos oy lo ke yamamos ‘’Karnaval’’. Komo el Karnaval de Rio, el Karnaval de Venezia, i mas. I Purim kaye a la mizma epoka. A la fin del Karnaval, sakrifikavan animales para ofreser a los dyozes i despues djuzgavan el autor del sakrifisyo.

El autor del sakrifisyo era el kuchiyo aguzado ke sirvyo para degoyar. Por kastigar el kuchiyo, lo echavan a la mar. Asi otra kuryozidad del Pasado.

En la epoka Romana, kuando uno era envitado a komer en la kaza de otro, devia de yevarse una tovaja para azer un bogo, ande metia la komida ke kedo para dar a los esklavos de su kaza. Si el patron no le trayiya este bogo, el esklavo tenia el derecho de kesharse, porke el esklavo era el maestro de la kozina.

Una koza ke oy mos parese kuriozo son las ‘’Latrinas’’ (Tualet) publikas ke los ombres utilizavan. Las ‘’Latrinas’’ mas ke por nesesidad, servian tambien a sosyalizar, a avlar kon sus vizinos, saver los haberes del diya, dizir su idea i enkontrar a los amigos.

En Efesos tenemos una latrina muy adornada. Debasho del asyento koryiya siempre agua ke limpyava el lugar. La Diosa ke guadrava las latrinas era la Diosa Fortuna. Ansi los ombres savian ke no se ivan a azer hazinos.

Ostrasizmo; Una kuryozidad de la Gresya Antigua era de ekspulsar la persona ke kreyiya ser kontra del estado, o evitar los Lideres ke puediyan ser, a lo largo, Diktatores. Esto se yamava Ostrasizmo i ovligava al ekspulsado de kedar 10 anyos leshos de su sivdad o de su payiz. Esto era una manera de evitar una diktadura. Esta kostumbre antigua seria buen egzemplo si se praktikava para siertos dirijentes de varios payizes de muestra epoka.

Una otra kuryozidad es la famoza armada de la China antigua ande todos los soldados en forma de estatua eran echos de barro i ke kada una de estas miles de estatuas de soldados tienen una forma diferente i ni uno no se parese al otro.

Algunos estan sovre kavayos, otros komo la infanteriya ke van a pye. Estas estatuas de soldados ke fueron deskuviertas en el anyo 1974, estavan todas enterradas. Estos soldados apartenian al emperador Kin Shi Huang, ke bivyo en los anyos 210 antes de muestra era, en la sivdad de Shian. Las grandes estatuas reprezentavan los jenerales, es dizir ke kada estatua, dependyendo de su rolo, tenia un tamanyo (boy) diferente. Aviya mizmo soldados enriva de arabas de gerra, todo echo en terra-kota, o barro. En total, mas de 8000 soldados, 130 Arabas de Gerra, 520 Kavayos. La razon por ke esta armada se izo; se dize ke era, sea para defender el emperador en el mundo de los muertos, o sea ke el emperador keriya mostrar su poder i su glorya.

Se dize tambien ke fueron echos al lugar de sakrifisyos umanos. Fueron preparados kavesas, brasos, manos, pyes i fueron adjustados uno por uno. La mayoriya de estas estatuas estan prezervadas perfektamente.