Saver Sovrebivir

Aze poko tyempo ke meldimos el haber de la kayida de un avion en Kolombiya i ke 4 ijikos de la misma famiya sovrebivyeron unos 40 diyas en la shara de luvya de la Amazonya. En el avion ke kayo el 1 de Mayo 2023, aviya aparte del pilot i de su ayudante, una famiya de 5 personas ke eran la madre i los kuatro ijikos. El avion se alevanto de Araracuara en Kolombiya para irse a San Jose del Guaviare, al fondo de la Amazonya i kayo en medyo de la shara de luvyas en la Amazonya. En este aksidente, la madre de los ijikos, el pilot i su ayudante muryeron.

De los kuatro ermanos, la mas grande, Lesly, teniya 13 anyos, Soleiny 9 anyos, Tien Noriel 5 anyos i Cristin, la mas chika, solo 11 mezes, apenas ke empeso a kaminar. Kuando kayo el avion, los ijikos se kedaron al lado del aksidente. Komyeron un poko de pan de arina ke toparon en el avion i se metyeron a bushkar un rio para bever agua. Antes de alesharsen, tomaron del avion un mantel, una lampa de aldikera, unas kuantas vestimyentas i dos telefonos ke ya se deskargaron en muy poko tyempo. Todos los diyas ke kedaron en la Amazonya, komyeron syertas frutas, i raizes de syertas plantas ke konsideraron komestibles.

Esta famiya apartenesiya a la trivu de Uitoto, nativos de la Amazonya. Los ijikos konosiyan muy byen la shara i saviyan muy byen lo ke deviyan de komer i lo ke no deviyan de komer. Durante estos diyas ke los estavan bushkando, los ijikos se kedaron serka de un rio, bevyendo agua de una ridoma de soda ke tomaron del avion. El milagro mas grande fue ke no tuvyeron dingun danyo de la kayida del avion, aunke sus madre perdyo la vida kuatro diyas despues del aksidente. Eliran Arazi, un antropologo de la “Universita Ebrea de Yerushalayim” i de la “Eskola de Estudyos Avansadas de las Syensyas Sosyales de Paris” ke izo estudyos sovre este evenimiento dize ke los ijikos de estas trivus, antes mizmo de entrar a la eskola primarya, akompanyan sus padres en munchas aktividades komo kaminar en la shara, en la agrikultura, en la peshka, en la kasa, en arekojer myel i en konoser las frutas salvajes de la shara.

De la edad ke son muy chikos, ya saven avrir un kamino en la shara, komo topar agua para bever, se ambezan a konoser los animales salvajes segun sus golores i las guayas ke deshan los animales, komo jaguar i kulevras, para pueder protejarsen. Al pareser ke la kreyensa ke los chikos teniyan en los shamanes de sus puevlo, les ayudo tambyen a sovrebivir sin peryer la esperansa. Kon las konsejas ke los aedados les kontan, los chikos saven muy byen adaptarsen en las relasyones entre animales, plantas i umanos. Esto les da la saviduriya para la proteksyon de la natura, sin kavzar algun danyo, koza ke los sivdadanos no kumplen i koza ke esta en peligro de dezapareser.

Esta saviduriya se formo durante miles de anyos en estas personas ke bivyeron en estos lugares. Un otro milagro ke el mundo se maraviyo fue la kapasidad de la grande ermana Lesly, de 13 anyos, ke supo tener kuidado de sus ermanos chikos i mas i mas, de la mas chika Cristin, ke teniya solo 11 mezes. Kuando fueron topados, eya estava dizyendo ke ya estava oyendo los anunsyos ke se estavan azyendo a traves de helikopteres de estar ande se topavan. Efektivamente metyeron oparlores ke aziyan oyer la boz en un radio (radius, rayon) de un kilometro i medyo. Saver ke en estas trivus, la ermana grande se aze la madre para tener kuidado de sus ermanos mas chikos.

Eliran Arazi dize ke es un dover de prezervar estos konosimyentos ke tyenen grande valor i ke dan vida a los milagros. No puedemos permetirmos a verlos dezapareser.