Paris: la Kaza de Kamondo

En la maale 8 (8eme Arr) de Paris ay un parko ermozo ke se yama Park Monceau (Monso) a lo largo de la avenida Monceau. Serka de este parko elegante esta el muzeo Nisim de Kamondo ke fue su rezidensya en Paris. Esta kaza ande el bivyo esta muy serka del Arko de Triomfo i de la muy famoza avenida Champs Elysées. Esta kaza maraviyoza fue konstruida por el Konde (Kont) Moiz de Kamondo i la arkitektura fue inspirada del famozo palasyo Versailles. Despues de pasar por grandes puertas i ver un grande i ermozo kortijo, se entra a la sala ande ay una eskalera elegante ke da la vuelta para suvir al etaj de ariva.

Esta eskalera mos aze akodrar las eskaleras ke davan vueltas en el es.huenyo de Tevye el lechero, en la piesa del Violonisto en el Tejado. El keriya 2 eskaleras en su kaza, una para suvir i abashar i la otra sin alguna utilidad para azer hadras i baranas. La Salamanje, (Salle a Manger) de este muzeo ke mira a unas guertas muy elaboradas, tiene muebles klasikos, pinturas de grande valores, porselenas de lo mas fino. El konde Moiz de Kamondo era el eredero de una fortuna muy importante de Bankarios Djudyos. El pudo koleksyonar ovras de los artistos famozos del siglo 18, una meza kuvyerta de arvole petrifikado ke pertenesyo a la Reyna Marie Antoinette i artikulos dekorativos de lukso i utiles de Plata ke aziyan parte de la rikeza de la Reyna la “Grande Katerina” de Rusya.

Moiz i su primo İzak de Kamondo eran grandes admiradores de Pintura i ayudaron muncho a artistos de sus epokas komo Monet, Manet, Cezanne i Degas. (Aunke Degas era un gran antisemita). Izak de Kamondo dyo toda su koleksyon de pinturas al Muzeo “Le Louvre” i por munchos anyos, estas ovras kedaron en los depos del muzeo. Los ermanos Kamondo eran miembros de la fondasyon del “Louvre” i lo mas de las reunyones se aziyan al rededor de la meza somptuosa de la salamanje, mirando sovre la avenida Monceau. En 1891, Moiz de Kamondo se kazo kon Iren Cahen (Kohen) de Anvers (Beldjika), la ija de Louis Cahen de Anvers, uno de los bankarios mas rikos de Evropa, siendo patron de la Banka ke oy se yama BNP Paribas.

Esta famiya tenia la tradisyon de dizir ke viniyan de la linya del Rey David. La mujer de Moiz, Irene, fue pintada por el famozo pintor, Renoir, kuando era una ijika de 8 anyos, i esta pintura se yama i se konose komo ‘’La chikitika Irene’’. La famiya Kamondo empeso kon Avram Salamon Kamondo, ke nasyo en 1781 en Estambol. Kon el tyempo, A. S. Kamondo se izo el gran finansiero del Imperio Otomano i fue yamado el “Rotschild del Este”. Se izo konsejero i el ombre de konfiensya del Gran Vezir i de los Sultanes Abdülmecid i Abdülaziz, ayudo a los gastos de la gerra de Krimea, en las reformas del Tanzimat para la konsolidasyon del Estado.

El Emperador, Franz Joseph lo invito a Viena por su boda en el anyo 1854 i le dyo el titulo de Kavalyero (Chevalier). El Rey Italyano, Viktor Emanuel le dyo el titulo de “Konde” (Kont) despues de sus aktos de filantropia ke izo en Italya en el anyo 1867. El ayudo muncho a los Djudyos del Imperyo Otomano ke eran unos sien miles en diferentes sivdades del Imperio. En todo el teritoryo del Imperio kon los Balkanes, Salonika, Siria, Irak, Ejipto de oy ke aziyan parte del Imperyo, Kamondo tuvo tanbien munchos problemes kon los dirijentes relijyozos de la komudidad djudiya porke el apoyava la Eskola de la Aliansa ande la ensenyansa era en Fransez i los relijyozos no estavan kontentes i se espantavan ke esta ensenyansa puediya kavzar la asimilasyon.

Kamondo dyo su kaza de Estambol a Mozes Montiofore, otro filantropo, ke vino a Estambol para ayudar a rezolver el problem de los djudyos ke fueron enkarselados en Siria, despues de la aftira de sangre i tuvo entrevistas kon el Sultan Abdül Mecit sovre este tema. El problem fue rezolvido i el se kedo en el domisilyo de Avram Kamondo, su amigo. El ijo de Avram muryo muy joven, i los inyetos Avram Bohor i Nesim transmityeron el Banko de Estambol a Paris a la kaye LaFayette en 1868. Konstruyeron kazas en la kaye de Monceau i dentro una Yeshiva ande aviya toda la rikeza Djudiya del nono Avram, komo rulos de la Tora, kon sus keter de plata.

El nono Avram muryo a los 92 anyos en 1873 i toda la famiya pasaron a Paris. El mozoleo ande fue enterrado esta en Estambol. Despues, el puerpo fue yevado a Paris. El Mozoleo fue abandonado i sirvyo de azilyo a los ke no tenian kazas para morar. Aze anyos ke fue restorado por la Munisipalidad de Estambol. Los dos ermanos Avram Bohor i Nesim muryeron en 1889. El ijo de Nesim, Moiz se aviya kazado kon Irene Cahen. En la segunda gerra mundial, Beatrice, la ija de Iren i unika eredera de la fortuna, aun ke se konvirtyo al Kristyanismo, fue matada en Auschwitz por los Nazis. Vidas de rekuerdos rikos, yenas de istorya i egzemplos de koraje i muncha enerjiya vital.

Adaptado del artikolo de R.B. Goldschmidt