La Paloma

Tenemos una inyeta ke se yama Paloma i bive en Londra. Este nombre fue eskojido por sus padres komo simbolo de paz i buena ventura. Esta palavra en realidad es muy rika en simbolos adaptados por diferentes puevlos, diferentes kreensyas, diferentes pintores i mas i mas. A traves de los siglos este pashariko forma una ikonografiya muy rika sea en el arte en jeneral o sea en figuras relijiozas. En la mitolojiya, la Paloma reprezentava la Diosa Madre. En las ruinas del templo de Mezopotamya vemos palomas en relieve komo pasharikos dekorativos ke reprezentan la Diosa Madre. En el templo de de Chipre, las Palomas simbolizan figuras de felisidad i de prokreasyon.

I se izyeron los pasharikos sagrados de Astarte, la diosa de Kanaan, ke su nombre troko en Ester. La mizma koza se ve en las Diosas Venus i Fortuna ke son depiktadas tenyendo las palomas en las manos o ensima sus kavesas. La paloma reprezenta tan bien el Reflo o “Ruah”. Sea en el Bereshit, sea en los rulos de la Mar Muerta, vemos ke la “Ruah” esta relasyonada kon Palomas. Una otra figura de paloma enkontramos en la istorya de Noah. La paloma ke torno kon la rama de olivo en su boka, anunsya a Noah ke se aserka de la tierra. La mizma figura aparese tambien en la epopea de Gilgamish.

En esta epopea de Gilgamish, Utnapishtim embiya del arka una paloma ke torna atras. Despues de un sierto tiempo esta vez embiya un kuervo ke no torna atras. Asi se entiende ke el kuervo pudo abashar a la tierra seka. En la Tora se avla tan bien del puevlo djudyo, i de palomas sakrifikadas. Tenemos en Yerushalayim, en la sivdad de David, ruinas de Kolombariyas. (Torre de Kolombas) ande teniyan kolombas para los sakrifisyos. El Kristyanizmo adopto la paloma para simbolizar el Spirito Santo ke emana del Dyo. La palavra grega antigua de Paloma era: “Peritera”, ke viene de “Perah Ishtar” de la lingua semitika i ke kere dizir “Flor o Pashariko de Ishtar”.

La diosa Afrodit o Venus se ve siempre kon Palomas ensima de eya o al rededor de los Vazos antikas. Las palomas son sagradas en la mitotojiya Japoneza porke es el espirito de Hachiman, el dyo de guerras en la fe Shinto i Budista. La paloma es tan bien asosiyada kon la Paz i pasifizmo komo en las Olimpiadas. En la politika se izo el simbolo de las protestas kontra la gerra i la violensa. La paloma kon la rama de olivo se izo el simbolo del movimiento “Paz i Libertad” en el siglo 15. En el siglo 20, se ven en las litografiyas de Pablo Picasso (esta vez sin la rama de olivo).

I es asi ke muestra inyeta me permityo de nombrarla kon el eskarinyo ke tenemos de verla. Ke su nombre trayga la esperansa de salud i paz al mundo. Los pasharos, las diosas i dios, los amueletos pueden ser egzemplos interesantes. Por la umanidad, la paz mundial i spiritual yegara kon la kontribusyon de kada uno de mozotros tenyendo en kuenta ke estamos en un mizmo barko, i antes ke tome demazyada agua i se unde, ay ke protejarla. Un otro nombre, por koensidensya, de muevo de uno de muestros inyetos es Noah. Komo Paloma, me dyo gana de mirar de mas serka al nombre Noah a traves de los siglos.

La Perasha mos avlava del Mabul ke akontesyo a los empesijos del tiempo i de Noah. Al sigundo inyeto kuando le metyeron este nombre, mos tresalimos. Este nombre simboliza la djustedad, la derechura, la onestedad i mos aze akodrar ke devemos siempre ser korrektos, amar i alavar la natura i desharla en buenas kondisyones para el futuro de las muevas jenerasyones. Meldando la perasha de Noah, me apersivi ke no konosemos muy bien la personalidad de Noah. Savemos ke es derecho ama no ay ningun detalyo sovre su vida i su karakter. El onkli Google mos dize ke este nombre sinyifika trankilidad, paz, intelijensya, refleksyon, i el ke tiene este nombre es kerido i savrozo.

El treser inyeto ke es el ermano buchuk de Noah se yama “Ilan” ke kere dizir en Ivrit, Arvole. En el Bereshit, se avla de “Hag ha Ilanot” ke es lo ke selebramos la fiesta de “Tu bishvat”. Fiesta de arvoles i de todo lo ke komemos ke krese de la tierra. Arvole mos aze pensar a ser derecho, tener raizes fuertes, saver dar a la Natura lo ke resivimos de la Natura. Avlando de arvole mos akodramos de la prohibisyon de tokar al “Arvole del Konosimyento del Bien i del Mal” ke fue el kavzo ke Adam i Eva pekaron. Avlando de arvole, savemos ke las raizes mos azen akodrar ke el ombre deve de atarse a sus raizes, las ramas sembolizando el ogar i la famiya.

El arvole en kurto es el símbolo de la vida i del renasimyento. Así muestros tres inyetos me izyeron pensar sovre sus nombres, el sinyifikado de sus nombres i lo ke pueden simbolizar en la vida.