Sovre Ruinas Arkeolojikas de Kehilot

Kreyo ke deve de ser enteresante de saver komo konstruyeron las Kehilot ke teniyamos aze serka de 2000 anyos. La arkeolojiya mos da sinyales de la egzistensya de sinagogas ke fueron konstruidas en Turkiya. Komo savemos ke Djudyos moraron aki mizmo despues del egzilyo de Babilonya. La egzistensya de Djudyos en munchos otros payizes se nota en los simeteryos kon las piedras tombales. De las piedras tombales puedemos saver un poko sovre los nombres de la famiya, sovre la profesyon del defunto. Aze poko tyempo ke fueron deskuvyertos restos de una Sinagoga en Alemanya, en la rejyon de Kolonya (Köln), Sinagoga de la epoka Romana. Lo ke aze pensar ke puede ser una Sinagoga, es ke el plano del tereno mostra ke la sala se termina kon una parte semi redonda al este, i al norte de la sala deviya de aver komo una chika pisina ke puediya ser el Mikve.

Komo estas ruinas no estan muy bien prezervadas, se pensa ke esta konstruksyon probablamente era una Sinagoga. Sardis ke era kapital del reynado de Lidya ande por la primera vez en la istorya umana akunyaron moneda los Djudyos ke moravan ayi konstruyeron una Sinagoga djusto al lado del Gymnasium, ande los mansevos romanos azian kultura fizika desnudos i entravan a la pisina ke se topava djusto al lado para lavarsen i limpyarsen despues de los djugos. Esta Sinagoga de Sardis se kompoza solo de una grande sala. Una Sinagoga de epoka similar fue enkontrada en la Isla Grega Delos, serka de Atena. Esta Sinagoga tenia una pared ke separava ombres i mujeres.

Ama en la Sinagoga de Sardis no ay trasa de pared. Un lado de la Sinagoga esta apegado al Gymnasium, en el otro lado una pared ande devia de aver un merkado, se pueden ver los nombres de los patrones de las butikas. Estos nombres son nombres tipikos, nombres konosidos de djudyos. Una otra Sinagoga de la mizma epoka esta en Priene. Priene es una sivdad antigua de Iyonya, ke teniya puerto en la Mar Egea. Kon el tyempo, las aluvyones del Rio Meandros (Menderes), el puerto se yeno i la sivdad kedo 7 km atras, tal komo Efes. La sivdad Priene fue konstruida por el famozo arkitekto Hipodamos. El planeyava las kayes en forma kuadrada, i kada blok de kazas formava un grupo de 8 kazas.

Oy son ansi munchas de las Sivdades Evropeas. Mozotros no estamos akostumbrados de avlar kon kuadras, ama ansi eran las sivdades antiguas de muestro payis. Priene esta entre Kuşadası i Miletos ande nasyo Hipodamos. La sivdad esta konstruida en una kolina, kaji ke se puede dizir montanya. La urbanizasyon de la sivdad fue tan bien echa ke oy en diya se ven muy bien los buris de barro ke trayiyan agua a la sivdad. Los otros buris de kanalizasyon ke vazyavan las aguas suzyas al rio, estan komo si fueran muevos, rezin echos. La Sinagoga de Priene esta en la terasa debasho del merkado komersyal (Agora). En este merkado se topavan todos los artikolos de komer, komo karne, zerzevat, frutas, ets.

Priene tenia tambien un otro merkado ke era el Merkado Publiko. ’”Agora del estado’’. La Sinagoga era muy chikitika, kaji komo una kazika, ande se nota en las paredes sinyales ande devia de aver bankos para asentar. En el gymnasium se ven las pilas komo en un hamam, i en kada pila grafitis ke los mansevos eskrivyeron. Kuando uno vijita este Gymnasium se siente verdaderamente ke esta en un Gymasium kon los atletes mansevos shakadjis. En la pared de la Sinagoga ke mira al este se nota komo un nicho, ke devriya ser el ‘’Aron a Kodesh’’. Un blok de marmol tiene ensima el Monogramo de la Menora. (Kreyo ke los Vandales rompyeron este blok de marmol).

Un Mikve, no muy grande, esta al lado de la entrada. Ay ke saver ke las Sinagogas de la Diaspora (Afuera de Yerushalayim) no devian de tener el mizmo plano ke el “Beit ha Migdash”. La palavra Sinagoga kere dizir ’’Lugar de Reunyon’’. La mizma definisyon es valida para la palavra Iglezya o Cami. La Sinagoga de Myra, kazaliko muy serka de Fenike i ke es muy konosido, porke se dize ke ‘’Aya Nikola’’ o el ‘’Papa Noel’’ bivyo ayi. Los Amerikanos lo yaman ‘’Santa Claus’’. La iglesya ande fue enterrado se vijita por munchos turistos. Mas despues, en la Edad Media, los Italyanos se yevaron el sepulkro de San Nikola a Bari ke se topa en Italya, serka de la Mar Adriatika.

En esta Sinagoga de Myra, los arkeologos enkontraron pedasos de blokes de marmol ande se ven en uno de eyos la Menora i el Shofar, i en el otro la Menora i el lulav. El Mikve se ve tambien muy bien, resivyendo la agua de luvya del tejado i vazyandola al rio. Esta Sinagoga devia ser del siglo 5 o 7 de muestra era, kere dizir de la epoka bizantina. Esperamos ke en el futuro (despues de la era de Corona), vamos a enkontrar otras eskavasyones de sinagogas en Anatolia, porke los Djudyos bivyeron en munchos lugares ensima de estas tierras.