Paseos

Munchos de los paseos son los rekueordos ke mos kedan por siempre en muestras vidas. Me akodro ke mos ivamos a pasear de Balat a Bostan İskelesi, a Ketana, i mizmo a Tuzla para bever una agua shavda, ke luchava kontra la tenya. Para pueder bever esta agua, deviyamos de komer azetunas saladas. Mos ivamos a Yakacık, a Çırçır, a Hünkâr Suyu o a Sultan Suyu pasando todo el diya en estos lugares. Era de uzo de meter una savana o un piké delgado en la tierra ande se komiya. Para aparejar la komida de estos diyas, se gizava la semana entera. Estos paseos egzistiyan desde los siglos pasados. Me akodro ke kuando mos ivamos a estos lugares de piknik, ivamos endjuntos kon munchas famiyas ke se konosiyan, los ombres formavan un grupo separado i las mujeres formavan otro grupo.

Tambien se formavan grupos segun la lingua ke se avlava i sigun el nivel sosyal al kual aparteniyan. Ketana i sus alrededores se yamava “Las aguas dulses de Evropa”. Göksu i Küçüksu se yamavan “Las aguas dulses de Asya”. Me akodro ke ivamos a Küçüksu para komer misir (maiz). Aviya un monton de kalderas ande serviyan los misires, i en las ojas de los misires, metiyan sal i el misir kayente. Ansi no mos kemavamos las manos en komiendo el misir. Los viajeros izieron aluzyon al Hyde Park de Londra, dizyendo ke “Las aguas dulses de Asya” son paresidas a este parke. Se save ke la imajinasion no tiene fin.

Para yegar a estos lugares aviya arabas travadas por vakas. Me akodro tambien ke kon estas arabas mos ivamos a Polonezköy. Arabas ande mos asentavamos de lado i mi madre se keshava ke le tuyiya el popo. Una otra forma de yegar a estos lugares era kon las barkas. En estos lugares, kada minoriya se arekojiya kon sus grupos. Los Djuyos aziyan un grupo, los Gregos otro grupo, los Armenos formavan otro grupo. Era bastante raro de verlos mesklados i kada grupo avlava su propria lingua i las savores de las komidas eran diferentes. Las famiyas poderozas teniyan sus propias barkas. Ansi se ivan a Ketana o Küçüksu kon sus barkas.

Aviya barkas ande entravan solo ombres o solo mujeres. Esta separasion se puediya ver in en los lugares de reunion komo los Piknikes. Aparte de los Turkos/Musulmanes ke preferiyan de pasear el Viernes, las minoriyas saliyan a los paseos el Alhad. Siertas famiyas veniyan a estos paseos kon sus ayudantes para no lavorar i kansarsen en estos lugares. El viajero Wittman, en 1803, diziya ke las famiyas umildes, no teniyan una grande separasion de ombre i mujer. Julia Pardo, en 1837, eskrive: “En estos lugares de paseos, i mas en los diyas de fiestas, la komunikasion del povre i del riko no aze dingun prejudisio a la sosiedad. El riko se asenta al lado del Kayikchi, el patron al lado del Balukchi.”

El viajero Smith remarka, en 1850, ke una partikularidad del ombre turko es de djugar kon el teshpih. Riko o prove no aze dinguna diferensya. Se ariman a un arvole i por oras se eglenean kon el teshpih. Las mujeres turkas/ musulmanas komo todas las mujeres de diferentes minoriyas, teniyan tambien en sus manos teshpihes. Entre las aktividades sportivas, era la lucha (güreş) ke plaziya a todos. Solo el viajero Frankland, en 1830, eskrive ansi: “En Fenerbahçe, ke estavamos entre los pinos, avia siertas mujeres ke estavan nadando kon la ayuda de sus sirvientes negras (de rasa preta)”. J. Pardo adjusta ke el nargile era de moda para mujeres komo para los ombres i trayiyan peham (kimur) para arebivir el nargile.

Otro pasatiempo eran los djambazes, i las zinganas ke tanyavan i baylavan. Las observasiones sovre la mujeres fueron mas korektas por las viajeras ke tuvieron la shans de ser invitadas siendo serkanas de ambasadores, o de los diplomates estranjeros, ke pudieron asentarsen entre las mujeres, al kontrario de los ombres ke deviyan de estar entre los ombres. Viajar, ver i konoser es siempre un privilejio en todas las epokas. Adaptado i adjustado de un estudio de Zofie Uçar.