La Korte Judisial de Nuremberg

En el tribunal de Nuremberg, unas 200 personas del governo, de la armada, de doktores, de los komersantes Alman fueron djuzgados komo kriminales por lo ke izyeron en la Segunda Gerra Mondial. Los dirijentes del partido Nazi, komo Rudolf Hess, Hermann Göring, fueron djuzgados por los krimes ke izyeron kontra la umanidad durante la Shoa. Savemos ke lo mas de los dirijentes se eskondyeron, o se fuyeron afuera de la Almanya. Algunos fueron aferrados mas despues i fueron djuzgados, komo Eichmann. Esta korte se izo en Nuremberg, una sivdad de Almanya debasho del kontrol de los Estados Unidos a la fin de la Segunda Gerra Mondial. Para azer esta korte, los kuatro Estados ke se metyeron de akordo eran los Estados Unidos, la Ingletierra, la Unyon Sovyetika i el Governo provizoryo de Fransya.

En este djuzgo kuatro temas fueron djuzgados: los komplos, los krimes kontra la paz, los krimes de gerra, i lo mas importante, los krimes kontra la umanidad. Este djuzgo de Nuremberg avryo el kamino a syertos derechos enternasyonales, komo la Konvansyon de las Nasyones Unidas sovre la Shoa (1948), i la Deklarasyon Universal de Derechos Umanos (1948). Por este djuzgo los aliados eskojyeron la sivdad de Nuremberg entre las otras tres ke eran kandidados. Las otras tres eran Leipzig, Munih i Luxembourg. La desizyon por Nuremberg fue por dos kavzos: Las aktividades del partido Nazi empesaron en Nuremberg; i aunke la sivdad estava entera derrokada, el edifisyo del palasyo de Djustisya, el Grand Hotel i el edifisyo de la Munisipalidad kedaron kaji intaktas.

Tambyen fue en Nuremberg ke se proklamaron las primeras leyes antisemitas en 1935. Los Amerikanos trusheron la elektrisidad, la agua, el telefon i el tramvay. Entre los jurnalistos aviya Joseph Kessel, (1898-1979) un muy famozo eskrivano Djudyo ke bivyo i muryo en Fransya i se izo myembro de la Akademiya Franseza. Entre sus livros, “La ermoza de diya” (Belle de Jour) se izo un filmo kon Luis Buñuel i kon Catherine Deneuve. Kuando fue akseptado a la Akademiya Franseza, izo adornar su espada kon un grande Magen David, koza ke nunka se vido en la Akademiya. Otro jurnalisto Djudyo era Markus Wolf (1923-2006). Nasido en Almanya, kon su famiya emigro a Suisa, Fransya i enfin a Rusya kuando Hitler suvyo al poder.

Entro a la karriera diplomatika i se izo el dirijente de la Polisiya Sekreta de la Almanya del Este. Un treser jurnalisto Djudyo era Richard Llewelyn (1906-1983), el famozo eskrivano Inglez konosido kon su livro “Tan Vedre ke era mi vaye” (How Green was my valley). Richard bivyo anyos en Eilat i muryo en Dublin. La jurnalista Gitta Sereny (1921-2012), ke nasyo en Viena i ke muryo en Cambridge, Ingletierra, ija de la Djudiya Almana Margit Herzfeld, eskrivyo en jeneral sovre la Shoa. La jurnalista Tullia Zevi (1919-2011), Nasida Calabi i kazada kon Bruno Zevi, fue la prezidente de la Unyon de las Komunidades Djudiyas de Italya i korespondente de la gazeta Maariv de Israel.

Komo prokurador, Bernard B. Fall (19261967), Djudyo nasido en Viena i en 1938 refujyado a Fransya, paso su vida komo profesor de Derecho en los Estados Unidos. Muryo en VietNam. Un otro prokurador era Adrian S. Fisher (1914-1983). Un treser avokado era David Daniel Marcus (1901-1948). Un kolonel militar de los Estados Unidos, a la envitasyon de Ben Gurion fue a Yerushalayim para organizar la defensa de la sivdad, i muryo en la bataya de Abou Gosh en 1948, un mez despues de la deklarasyon del Estado de Israel. Este nombre se dyo a este kazal porke los patrones de la tyerra se yamavan Abou Gosh, ama antes se yamava “Karyat Anab” (Kiryat Anavim), (Puevlo de Uvas).

Entre los avokados del grupo Fransez, se topava el Djudyo Joe Nordman (1905-2010) ke lavoro endjuntos kon Vincent Auriol, el primer Prezidente de la 4. Republika Franseza. Un otro avokado Djudyo del mizmo ekipo fransez era Leon Poliakov (19101997). Leon nasyo en St-Petersbourg, Rusya. Su famiya emigro a Paris para fuyir de la revolusyon Rusa. Estudyo derecho i se izo el pionero de la istorya de la Shoa. Syendo el sekretaryo del famozo Haham Schneour Zalman Schneersohn, fondo kon el primo del Haham, el CDJC (Centre de Documentation Juive […] korte fue el kavzo de una inovasyon muy importante ke fue la traduksyon simultanea, es dizir la traduksyon en el mizmo momento.

Sea los djuzgadores de los kuatro payizes, Los Estados Unidos, Ingletierra, Rusya i Fransya, sea los prokuradores, los avokados de estos kuatro payizes, sea los kriminales alman pudyeron oyir, entender i avlar en sus proprias linguas, tenyendo las kaskas para oyir de lo ke se tratava. Fue Raphael Lemkin, uno de los konsejeros ke invento la palavra “Jenosidyo” por la eksterminasyon del puevlo Djudyo. La palavra “Genos” en Grego kere dizir “puevlo” o “rasa”. La palavra “Cide” en Latin kere dizir “Matansias”. De ayi salyo la palavra “Jenosidyo”. Nunka Mas.