Komer en la Antiguedad

El umano syempre tuvo la nesesidad de komer para bivir. Se save ke kada sivilizasyon tuvo sus uzos i tradisyones por la forma de komer, por la manera de gizar, por la meskla de legumbres, por la karne del animal degoyado, i mas, i mas. Solo, no mos kedo munchas kozas eskritas ni de los Sumeryos, ni de los Ejipsyos, ni de otra sivilizasyon a parte de Gresya i Roma antigua. Los eskrivanos komo Aristofanes o Atanaeus mos desharon bastante materyal para konoser la kozina grega. En primer lugar, la kozina grega es muy simple. Mizmo en las reunyones sosyales ande la djente se espandiyan sovre un kovdo en los klines, la kozina se bazava sovre la semplisidad.

Segun el eskrivano Polyaenus, Aleksandro el Magno se burlo de la rikeza de komidas ke enkontro en Persya. Un otro eskrivano, Pausonias, dize: “Los de Persya, tenyendo una kozina tan rika, vinyeron a rovar la komida tan prove de los gregos”. Otro aspekto emportante de la kozina grega era ke su baza vyene del Mediterraneo kon la azetuna, el trigo i la uva para el vino. La karne era para los muy rikos. Degoyar un animal para komer era muy raro porke las bestyas komestibles serviyan para otros lavoros mas utiles. Komo la kavra ke nunka se komiya para pueder aprovecharse de su leche. Las kaloriyas veniyan sea del trigo, seya de la sevada en forma de pan, de pita o dulsurya.

El dezayuno se aziya kon pan de sevada untado en el vino i a vezes kon un poko de igos o azetunas. La komida de midi se tomava a medyo diya, yene kon pan untado al vino, igos, pishkado salado (no se si era garato, chiroz o liparida), azetunas i kezo. La komida mas importante del diya era al eskureser. Aya se komiya guevos, pishkado, azetuna, kezo, todo tipo de legumbres komo kol, safanorya, pipino i mas... El pishkado se koziya en kezo, al vino adjustavan muncha agua i ajo. La Savor de Boka era syempre dulsurya natural komo myel o igo. La manteka se uzava mas i mas en Trakya, la parte oeste de Asya Menor.

Los legumbres syendo muy karos en las grandes sivdades, los proves komiyan legumbres sekados en el sol i beviyan supa de lentejas. Ombres i mujeres no puediyan komer endjuntos. Si la kaza era grande, los esklavos sirviyan en primero los ombres, despues las mujeres i al final eyos puediyan komer. Si la kaza era chika, las mujeres puediyan komer despues de servir los ombres. La komida se komiya en una chanaka de masa o de barro (terra kota). Komo no konosiyan el piron, se yevavan la komida a la boka kon un bokado de pan. Ya saviyan lo ke era kuchara i kuchiyo. En la epoka romana, el dezayuno ke se yamava “jentaculum”, konsistiya en un poko de pan, myel i kezo.

La komida de midi, la “Sena” era la mas rika porke tenia tres platos. El primer plato era la entrada “Gustatio” kon kozikas de riir. El segundo era el plato de konsistensya “Primae Mensae” i la Savor de Boka era “Secundae Mensae”, kompuesta de frutas. Los proves ke eran la mayoriya, komiyan una lapa de sevada i komo no teniyan paras para el azete de kandil, komiyan la “sena” mas tadre i se ivan a la kama al eskureser. El pan se komiya kon myel, kon azetuna, kezo o guevo. I eyos undiyan el pan al vino. En Pompeii, se topo 30 ornos. Esto mos dize ke los Romanos komiyan muncho pan ke era akompanyado syempre kon sal.

Manteka no uzavan. La berendjena se konosyo kon los atakes de los Arabos. Tomates i patatas vinyeron de la Amerika. Legumbres komo apyo, kol, ravano, safanorya, kuchunugurya, bizelya i pipino se konsumiya muncho. Portokal no se konosiya. El limon entro a la meza romana despues del siglo 5. Los Romanos preferiyan la karne de poyo a la karne de puerko i vaka. Segun los eskritos, a los Romanos les plaziya komida kon savor dulse i agro, por esto uzavan muncho myel i vinagre. Los rikos konsumiyan bastante pishkado, lo ke no era el kavzo de la klasa medya, ama todos beviyan muncho alkol, porke konsideravan ke la agua puedriya tener muncha bakteriya i una savor shavda.

El vino konteniya muncho alkol, por esto le adjustavan muncha agua. A vezes metiyan myel al vino i lo beviyan kayente. A parte de vino, los Romanos beviyan tambyen bira ke yamavan “cerevisia”, lo ke oy en espanyol se dize “cerveza”. El cafe ke oy es muy famozo en Italya, se konosiya komo la “bevida muzulmana” porke empeso a ser bevido en Yemen i los payizes Evropeos lo konosyeron a traves de los Otomanos. El chayiziko vino despues del siglo 17 kon los Olandezes. Los Romanos utilizavan kuchiyo, piron grande para tener la karne, tava kon mango largo komo oy, kantaro para mezurar, kalup para dar la forma, rayo para rayar, mashá sea para la lumbre, sea por la karne, tripito para eskurrir.

Estas kozas se enkolgavan en los ganchos o en las kadenas ke estavan en la pared de la kozina. Kozinas privadas se puedian ver solo en las kazas de los muy rikos. La klasa medya teniya una kozina komun de la kual munchas famiyas se aprovechavan. Una koza mas ke mos kedo de los dirijentes romanos fue el “gostador”, el esklavo ke gostava la komida i la bevida de los dirijentes, porke el tosigo, tal komo oy, se uzava muncho para eskabuyirse de una persona dirijente. El gostador del emperador Claudius, Halotius, fue muy famozo en la istorya porke djurando de ser fidel i murir por el emperador kon el tosigo ke puediya estar en la komida o bevida, el mizmo entosego Claudius.

Al pareser oy en diya, este uzo no dezaperesyo porke se dize ke los prezidentes de los Estados Unidos mantyenen la tradisyon de tener gostadores. Algunas komidas komo el pan no tuvo dinguna diferensya desde la epoka de la pyedra asta oy. Una otra komida antigua es el arroz ke yamamos “Pilaf” en Turko. Esta palavra Pilaf vyene del persa ke diziyan “Polof”, i entro aya de India ke yamavan “Pulaow” espandyendose en toda Asya Santral. Kuando Aleksandro el Magno konkisto Samarkand, ke esta en Uzbekistan, le plazyo tanto el Pilaf, ke dyo el orden de kozinar esta komida en toda Makedonya. Es ansi ke la Evropa konosyo el arroz, koza ke ya se konosiya en China aze mas de 13.000 anyos.

Kon la yegada de los Mongoles a India, el pilaf se mesklo kon karne ke yamaron “Buryan” i esta meskla dyo lugar a la “Payela” famoza de Espanya. FUENTE: Anya Leonard, Ben Potter, Victor Labate, Wu Mingren