La Kultura Sefaradi en el Imperio Otomano

Los Djudyos Sefaradim, ekspulsados de Espanya, al vinir al Imperyo Otomano, moraron en grande mayoriya en Estanbol, Anderne, İzmir, Salonika, Halepo, Damasko (Sham), Bagdad, Kairo, Aleksandriya. Las relasyones kon los Djudyos del Norte de Italya i kon Sefaradim de Olanda, lo mas de Amsterdam, siempre fueron bien aktivas. El Imperyo Otomano konsiderava su povlasyon segun ser Muzulmano o no ser Muzulmano. Todos eran protejados por el Sultan. Ma los ke no eran Muzulmanos devian pagar una taksa, el ’’Djizye’’ i teniyan unas restriksyones ke pretendiyan degradarlos. Restriksyones komo vestimyenta de kolor diferente; no puediyan kavalgar (suvir a kavayo) o azer parte de las institusyones de ermandad (Ahilik) i de profesyones (Londjas).

La kultura de los Djudyos kaji ke no troko asta el siglo 19, o asta el empesijo del siglo 20, kuando empeso el modernizmo i la influensa del oksidente. Los Djudyos siendo bien konservativos, bivyeron segun las leyes de la Alaha i los ke no eran muy pratikantes formaron una minoriya sin importansya. La sosyedad Djudiya Sefaradi Otomana nunka alkanso al nivel kultural i saviduriya de los Sefaradis de Espanya. Los Sefaradis de Estanbol, la kapital Otomana, se ataron tanto a la kultura de esta sivdad, ke uvo una forma de konkurensya entre los Djudyos de Yerushalayim, Safed i Salonika. Los Sefaradim formaron kongregasyones (Kahal-Kehila) a la forma de las kongregasyones Espanyolas (Aljamas) de antes de la ekspulsyon de 1492, bazandosen sovre las leyes de Valladolid (en Espanya) del anyo 1432. (Gilles Veinstein).

El komportamyento de los Sefaradim kon los Romanyotes, (Djudyos ke kedaron del Imperyo Bizantino) al empesijo no fue muy amistozo. Kon el tyempo los Romanyotes se asimilaron kompletamente a la mayoriya Sefaradi. El komportamyento kon los Ashkenazim fue diferente. Uvo munchas olas de emigrasyones de los Ashkenazim en la tierra Otomana. Una emigrasyon Ashkenazi en el siglo 15 ke vinyeron antes de la grande ola Sefaradi de 1492 de los payizes komo Hungarya i Moldavya. Otras olas de emigrasyon Ashkenazi van a vinir en los siglos 16 i kon la konkista Otomana de Budin (Budapeshte) i de otros lugares. Los Djudyos para pueder moversen aryento del Imperyo Otomano, devian de tener un dokumento, komo el pasaporte de muestros diyas, ke se yamava ‘’Yol Hükmü’’ i ke los protejava, o mijor dicho, manteniya el detenor basho la grasya, o el ‘’Aman’’ del Sultan.

En tierra muzulmana, uno ke no tenia el ‘Yol Hükmü’, puediya ser egzekutido o ser esklavo. Los Sefaradim en el Imperyo Otomano fueron ekselentes en el arte del Tekstil ke ya lo konosiyan desde Espanya. Eyos trusheron fondos de Kapitales Fiskal ke el Imperyo nesesitava i apoyaron el Sultan en la diplomasiya, grasyas al saver linguas estranjeras. Los Sefaradim se organizaron segun la sivdad de la kuala vinyeron. Los ke vinyeron de Ohrid (Makedonya del Norte) formaron un Kahal kon su Kehila Ahrida, los de Kasturya (Gresya) otro Kahal, kon su Kehila Kasturiya, los de Yambol (Bulgarya), kon su Kehila Yambol. Aviya una identidad de grupo sosyal dependiendo de la relijyon, de la apartenensya, de la famiya, del lugar, de la klasa sosyal i de la formasyon kultural.

La apartenensya a la relijyon diktava la forma de bivir, su rango sosyal i las relasyones familyales. Esta identidad Djudiya, en el entorno Muzulmano Otomano, aziya ke teniyan un orgulyo de ser Djudyo, mirando de arebashar los ke no tenian este sentimyento i alesharsen de eyos para bivir en grupos serrados. La vida privada i sosyal se bazava segun el kalendaryo djudyo, igual komo oy selebramos el Bar Mitzva, o los meldados segun el kalendaryo djudyo. Tambien las selebrasyones de diyas de viktorya del Imperyo o del Sultan o su famiya, las fyestas Muzulmanas, komo el Ramazan o el sakrifisyo del kodrero, estavan eskritos segun el kalendaryo djudyo. A la roves de lo ke uno kreye, el djudyo en el Imperyo Otomano no era muy kultivado.

La grande mayoriya apenas konosiyan las letras del ivrit para meldar las orasyones, sin tener menester de saver eskrivir, afilu firmar su nombre. Si puedemos dizir eskola elementarya, era el Talmud Tora ande se ivan solo los ijikos. Asta el siglo 19, las ijikas no tuvyeron dinguna edukasyon i kaji todas eran inkultas. Por esta razon no uvo ovra literarya eskrita por Djudyos de estos siglos. Avlando de kultura, se puede dizir ke aviya dos kulturas: la kultura Djudiya Espanyola i la kultura Djudiya Otomana. La lingua Espanyola fue la yave para unifikar todos los djudyos del Imperyo Otomano i de la Diaspora Sefaradi. Kon la lingua, la Alaha, las kostumbres i la Kozina Sefaradi ayudaron a kompletar la unidad.

Lo ke es interesante, es ke los Djudyos Sefaradis en el Imperio Otomano, kon el tyempo, se olvidaron la ekspulsyon i nunka desharon la nostaljiya de Espanya, abrasando la lingua espanyola komo lingua maternal i la kultura ke teniyan, la forma de organizarsen i la manera espanyola de gizar las komidas ke preparavan. Las komidas savrozas espanyolas les plaziyan muncho i saviyan muy bien gizarlas. Esta nostaljiya no afekto ke los Djudyos Sefaradis sean bien integrados en las sivdades grandes, en la vida urbana, al kontraryo de la vida rural. Es ansi ke el Djudyo Sefaradi no se sintyo estranjero kuando se enkontrava kon Muzulmanos en la kavane o en el Banyo Turko (hamam).

La aktividad ekonomika de los Djudyos Sefaradis antes de todo era el komersyo i eran merkaderes. Aziyan komersyo de todo tipo, segun la abilidad ke tenian. Un komersyo importante era kon los payizes estranjeros de Evropa. Se okupavan de produksyones en atelyes chikos i el produkto importante era el tekstil. Servisyo fiskal kon las otoridades era importante porke puediyan alkilar el dover de impuestos, de taksas i duanas. Aviya grandes bankeres i eyos aziyan konsultasyones diplomatikas i konosiyan linguas estranjeras. Tambien los Djudyos eran muy famozos en Medisina. Eran konosidos komo djugadores, akrobates, kantadores i kontribuyeron kon makames muevos en la muzika, i teniyan una abilidad grande para azer djugar las kuklitas kon las kuedras, dedos i manos.

Aunke la lejislasyon Otomana keriya ver las minoriyas enferyor a los Muzulmanos, en la vida diyarya, esto no se notava i los avantajes ke teniyan los Muzulmanos izo ke la konversyon a esta relijyon se akselero en el siglo 17, tal komo la konversyon de Sabetay Sevi i las famiyas ke lo imitaron. Ay de akseptar ke estos konversos formaron la povlasyon intelektual de la sosyedad Otomana. Munchos Djudyos Konversos al Kristyanizmo desde Espanya, los Maranos tornaron de muevo a sus propria Relijyon en el siglo 17, al vinir al Emperyo Otomano, ayudando a la propriedad del Estado Otomano. Lo ke mos desho libre el Imperyo es importante; komo la lingua, las kreyensas, la mentalidad, las praktikas relijyozas.

La lingua era el Ladino, kon siertas palavras turkas komo musafir, fostan, maale, balta… Aviyamos dicho ke los ombres, para pueder meldar las orasyones, se ambezavan las letras ebreas, ma los savyos saviyan el Ivrit i la korespondensya entre Djudyos del mundo se aziya en jeneral en esta lingua. Azer kifur era en Turko. Del folklor Otomano, los Djudyos se apropriaron el personaje de Djoha, o Nasreddin Hodja, siertas dichas tradusidas al Ladino, los makames de la muzika turka kon los maftirim. Inkluzo siertos makames fueron kompozados por kompozitores djudyos, komo el Haham Algazi. La forma de bivir no era diferente de la nasyon otomana. Es dizir ke ombres i mujeres teniyan sus proprios entornos para entretenersen.

Djudiyas nunka se ivan a los kafes de los ombres. Eyas se entreteniyan entre vizinas o arekojyendosen en los kortijos de las kazas. La mentalidad era la mizma entre djudyos Sefaradis, Kristyanos i Muzulmanos. Una epidemia, una pandemiya, un fuego, una furtuna eran el porke de los pekados. En jeneral, Los djudyos se adaptaron a las kostumbres i a las leyes valides de los paizes ande bivyeron, i oy en dia sigen de la mizma manera en los diferentes payizes del mundo. Fuente del artikolo: Departamento de la Istorya Djudiya de la Universidad Ebrea de Yerushalayim, i adaptado de un estudyo de Amnon Cohen. Septembre 2020