Lo ke Fue Echo por la Primera Vez

Savemos ke la istorya empesa kon los Sumerios. Eyos fueron unos de los primeros puevlos a empesar a eskrivir i deshar por la posteridad las kozas ke afitaron en sus tyempos. Eskrivyeron kada diya todo lo ke se paso i ansina pudimos deskuvrir kontratos, letras, leyes, sanksyones i mas kozas ke notavan en tavlias de barro, utilizando el estilo de letras Kuneiforma, ke son lettras en forma rekta i no redonda. Estas letras se eskriviyan sovre las tavlias kon un metal puntudo antes de meterlas al orno. Avlamos de una epoka ke tiene kaji mas de sinko mil i kinyentos anyos. Los Ejipsyanos empesaron a eskrivir despues de los Sumerios ama eyos eskrivyeron en la forma ke yamamos “Hiyeroglifiko”, ande las palavras provenian de figuras.

Kuneiforma viene de la palavra latina “Cuneus” ke kere dizir klavo. Efektivamente lo ke empleyaron para eskrivir en una tavlia de barro era komo un klavo ke puediya deshar trasas en el barro aun blando, antes de meterla al orno para ke se aga solido, duro. Los Sumerios bivyeron en la rejyon ke yamamos Mezopotamya. Una rejyon ande estan situados payizes komo Turkiya, Sirya, Irak, Kuveyt i una parte de Iran. Mijor dicho, entre los riyos Tigris i Eufrates. (Dicle/Fırat) i los puevlos ke formavan esta rejyon eran variyados; los de Akad ke eran semitikos, los Hititas i mas otros puevlos. Otra koza ke empeso por la primera vez kon los Sumerios fue el kovre.

Antes de los Sumerios no tenemos ningun egzemplo de kualker lavoro ke fue echo kon el kovre. Eyos fueron los primeros a ver ke kon el kovre puediyan azer munchas kozas. Izyeron por primera vez un kalup mesklando el kovre kon el estanyo (kalay) i obtuvyeron el bronze aze mas de tres mil i kinyentos anyos. Los primeros objektos ke izyeron de Kovre fueron las puntas de las filechas, ke era muy importante para gerreyar i para kasar, algujas para apanyar peshkados, tinajas i kantaros. Eyos fueron tambien los ke toparon el Chikrik aze 5100 anyos. Asi izyeron las telas famozas kon las kuales los reyes i reynas de los payizes vizinos se izyeron kuzir vestidos somptuozos.

La primera ovra de literatura ke konosemos, la epopea de “Gılgamış” fue eskrita 5400 anyos antes. Esta epopea famoza, ande se bushka la vida eternal inkluendo la istorya del Mabul, fue eskrita muncho antes de la epopea de Homeros sovre la “Iliada i la Odisea”. Toda la epopea fue eskrita sovre las tavlias de barro. Otra ovra de literartura tambien de los Sumerios es “Las enstruksyones a ‘Shuruppah’”. Estas enstruksyones eran tekstos de hohma i por dar unos kuantos egzemplos, eyas dizen: -Un korason ke ama mantiene la famiya, un korason ke aborese destruye la famiya. -No djuzges kuando beves Bira. (Es ke la bevida Bira era una forma de pagar el empleyado.

Tenemos tavlias de barro ande markan varas de kantidad de bira ke el empyegado resiviya komo salaryo.) En la epopea de Gılgamış enkontramos tambien el primer plano de urbanizasyon. Las sivdades de Ur i Uruk estan deskritas kon grande egzaktitud de kayes i edifisyos konstruidos de ladriyos i piedras. (5500 anyos antes). Esta urbanizasyon tambien ayudo muncho al desvelopamyento de la ekonomiya. No olvidar ke el mundo konose a Hippodamos komo el primer arkitekto urbano ke nasyo en muestro payis, en Miletos, no muy leshos de İzmir. El se konose komo el primer arkitekto ke izo las kayes ermozas en linyas rektas, kortandosen en angulo de 90 grados, ma esto fue muncho mas despues de los Sumerios.

En el turizmo, damos los nombres de Miletos, Priene, komo egzemplo de sivdades antiguas de muestro payiz ke tienen este plano. Este plano sirvyo en munchas sivdades de los Estados Unidos de Amerika i siertas sivdades de Evropa. Los djugos ke se paresen a Dama o ShahMat se djugava entre los Sumerios, i tavlias kon senyales de estos djugos fueron topados en “Başur Höyük” en el sityo arkeolojiko al SudEste de Turkiya, i al norte de Mezopotamya, teritoryo de los Sumerios. El primer shavon para lavarse se izo en Mezopotamya por los Sumerios. Mesklaron la godrura de los animales kon siniza i agua. Estos primeros shavones eran para los relijiozos ofisiales ke los uzavan para purifikarsen antes de la orasyon.

Tambien las tavlias de barro mos dizen ke el shavon servia para kurar enfermedades de kuero. Hamurabi ke bivyo en el siglo 18 antes de muestra era, es un rey de los Sumerios i se dize ke las primeras leyes de djustisya fueron echas por el. Ama tenemos tavliyas de barro del siglo 20 antes de muestra era, ande meldamos leyes de djustisya. Estas tavlias estan en el Muzeo Arkeolojiko de Estambol, tradusidas por el Prof. Samuel Kramer, ke se konose komo el eskritor del famozo livro “La istorya empesa kon los Sumerios”. Estas son tavlias konosidas kon el nombre “El kodo de Ur-Nammu”. Ur-Nammu era el rey de los Sumerios ke bivyo en los anyos 2112-2085 antes de muestra era, dize ke se puede pagar kon paras o kon objektos similares de valor, los danyos ke se pueden kavzar a un puerpo humano.

De otra parte, matar, adulterio, violasyon de ijikas era kastigado por pena de muerte. Estas leyes fueron muncho mas tolerentes de las leyes de Hamurabi ke bivyo 300 anyos despues, i ke dize “Ojo por ojo, diente por diente”. Los Sumerios fueron una luz muy briyante ke iluminaron por siglos los kaminos de la umanidad.